迷陣

車爸爸悠長假期第十五天我哋走去樂富做點事,辦完後下午茶時間走咗去米線陣吃我喜歡的米線,早餐也未吃的我倆餓得見什麼也想吃,最後叫到一檯都係,可幸最後都清了九成hehe~

到埗時已二點半多但店內坐滿客人,好彩取票後只等了約3分鐘便有檯了^0^

餐廳裝潢挺骨子,地方清潔,用上開放式廚房,而最正係冷氣超足這點我很在意,因為車媽媽本身係火爐一個好鬼怕熱架!!

這兒的選擇超多,有熱葷小食啦,有特色嘅涼拌還有菇菌時蔬添。

而米線亦都同阿乜哥一樣，選擇咗湯底後可以隨意選自己喜歡嘅餸菜，仲有唔同嘅辣度選擇添！

唔想傷腦筋嘅仲可以選擇佢地嘅皇牌套餐，有米線先啦又小食仲有飲品添。

本來勁想試最特别的凍青瓜豆漿，可惜太好賣已經售罄！最後我哋揀咗青檸柚子梳打同埋芒果鐵觀音。

{青檸柚子梳打}原價18元， 我哋叫咗一份皇牌套餐所以係跟餐嘅,梳打都算夠氣,而味道也清新來配合辣食最好不過啦！

先叫兩份涼菜食下先^0^

{麻辣拍青瓜}$12 係車爸爸最喜歡食的涼菜,青瓜很爽口始終喜歡吃拍出來的,味道帶幽幽嘅麻香辣味不算太過強勁,所以車爸爸食得好開心。

{雞絲粉皮}原價$26而家我哋係跟王牌套餐上嘅,粉皮好爽滑冇異味,雞絲亦都算有肉香而且唔會有鞋霎霎嘅質感。

{特盛米線}$50即係大雜燴，內裏有牛肉片，白豚肉，雞髀肉，爽滑魚蛋，爽口牛丸，煙韌貢丸，火腿，松葉蟹棒，豆腐卜，鮮木耳鮮金菇和唐生菜，足足12款餸夠爆了嗎haha~

我揀咗{麻辣蕃茄湯底}另加$2當然只要了小辣因為我同車爸爸食吖嘛！湯底呷下蕃茄味很出亦鮮甜，而麻辣味就幽幽的隨而跟上，相信如果可以食大辣應該更加好味*^O^*

然而咁多餸菜中我最愛就係呢個白豚肉，腩肉質感軟滑帶有香濃嘅白鹵水味十分好吃。

而米線嘅質地亦都不錯呀,浸久了亦不會糊口我鍾意^_^

另一份係皇牌套餐的{大汗豬扒擔擔米線}$70，已包呢一碗米線同上述介紹嘅雞絲粉皮和飲品一杯，比起散叫平了十多元，吃得下絕對係抵食嘅！

大汗豬扒炸得好酥香，配合埋面頭的特色麻辣醬，香麻辣味也齊全， 呢個我同車爸爸都十分欣賞呢。

豬扒亦都係我喜歡嘅厚切，質感淋滑有肉感，我畀90分(^_-)

另外擔擔米線嘅湯底都好有驚喜 雖然不可以同上海菜館去比較但係作為一間米線店佢合格有餘，香，辣，麻味都齊全， 味道真的不錯！

剛才食過白豚肉嗰份鹵水味好吸引所以決定要嗌一份{川味四合拼盤}$45來吃， 四味分別係黑醋豬軟骨，麻辣肥牛，麻辣豬大腸及清甜蘿蔔。

{麻辣豬大腸}滷得夠晒入味，應有嘅腸味亦有留低，而且質地亦都十分軟淋， 整體很出色*^O^*

但係依個{黑糖豬軟骨}就更巴閉了!連從來不呷醋嘅車爸爸亦都讚嘆不絕,我試了一件真的驚為天人,糖醋味道恰好唔搶喉之餘加埋那份肉香味道真的很出色，而軟骨質感更是脆而不硬，吃一絕無膩感,無論味道質感都係上佳之作。

相比之下蘿蔔就冇咁出色啦始終都係夏天不時不食吖嘛!大家都明白留待冬天才好好欣賞你吧！！

最後喺樂富商場嘅出面仲有一啲Melody嘅擺設,兩條友又低低能能走去影相留念,跟住又出返去尖沙咀等夜晚跟朋友仔去食好西喇。