家常小菜

記錄一下近來兩餐羅家飯！車爸爸近來經常滿口飛滋痛苦難當，所以這夜滾了一個芫茜魚片皮蛋湯給他下下火打打氣。

在我心目中這個皮蛋芫茜魚片湯係最易煮的湯水，而且我會連芫茜根同煮功效味道也會出色多點，如果覺得有上火的朋友不妨煮來試，喝罷即時會熱氣全消㗎！

平時我很少買切開了的魚，但魚敗同我講這一個叫做狼魚的味道好鮮甜，而且肉質好紮實就算切開煮出嚟都係好鮮味，咁就試下啦我用上蒜頭豆豉來蒸，出來效果魚肉確紮實又滑身，不過啖啖肉吃下都幾漏喉㗎！下次可以唔使買咁大件！

另外還煮咗車爸爸落柯打嘅翠玉瓜，平時都係蒜蓉炒或者清炒，今次就惹味啲用上我啱啱買返嚟嘅魷魚醬炒，香香辣辣惹味得多而且翠玉瓜切咗粒車爸爸會比較容易吃，見他吃得自在我已經覺很滿足啦！

另一餐係上星期日車公公，車婆婆入嚟探我哋簡簡單單的一餐，蜜汁燒金沙骨，蒸了幾條海黃斑及炒一碟雪耳蜜糖豆，還加上清麗村姑給我的新鮮茴香好不豐富呀！

蜜汁燒金沙骨絕對係方便的餸，用數小時醃入味之後放入焗爐焗至金黃就食得，今次試了街市一檔賣本地豬頸肉販，豬肉味香濃冇騷味而且肉質好淋滑，雖然貴啲啲但係我覺得都好值得幫襯呀。

另外買了四條黃斑肉質嫩滑味道鮮美，車爸爸更甚欣賞它呢！

最後這碟蒜蓉炒雪耳蜜糖豆茴香，清爽無負擔加上香口新鮮茴香味道就更上一層樓！今次帶大家食住咁多先，下次羅家飯再見拜拜！！