樂天大喜屋

早喺1/2便跟車爸爸預早慶祝情人節(果真忙碌)當然首選食他最享受嘅放題啦,吃過中環大喜屋和極大喜屋都十分滿意便決定試新開業樂天大喜屋6:00pm~8:30pm時段$238/位+10%,不過此分店某些出品不及前兩者好但要一讚個場咁大都冇漏過一張單還坐得頗舒適
前菜:芝麻八爪魚味道正常,泰式鳳爪味道唔錯喎夠香辣,帆立貝群邊好腥no good,西班牙火腿沙律好矜貴咁喎得兩少片溚唔真咩味haha~ 
飲品:超多款有啤酒,百事可樂,七喜,椰子奶,樂天芒果汁,石榴汁,檸檬茶,忌廉溝鮮奶,道也荔枝,巨峰提子,烏龍茶等等..... 
刺身: 愛吃刺身嘅朋友仔咪眨眼呢度D刺身非吃不可尤其深海鯨龍,油甘魚,帶子,天使蝦和極大赤蝦yummy非常(流口水中)
大家睇下車爸爸如何鯨吞那極大赤蝦(好有戲啊~) 
壽司:造型超美用店名字命名的壽司唔止睇得還吃得,中間那碟係魚,貝類最愛上二件黑松露油甘魚香氣撲鼻其它質素也不差呀
日式放題竟然有意式龍蝦湯,有點唔湯唔水都係專心做日式吧!!鮮蟹粥就不同了鮮味粥底綿滑好吃超多蟹呢~ 
和風汁炒牛柳粒車爸爸吃一口便放棄了實在太韌吧!!燒香草羊鞍車爸爸話味道OK可惜有點過熟
鹽燒海蝦夠彈牙,右邊那碟炸物味道好好但炸到太油膩了失敗啊,天婦羅蝦車爸爸話OK喎那小蕃薯竟然攞嚟做天婦羅想吃多點也不能,黑松露焗帆立貝小酥盒呢個好好味啊焗得酥脆內有香噴噴嘅松露香氣如果唔係要食其它嘢真想吃多件噢!!
極品煮鮮鮑~鮑魚件頭不少有咬口可惜欠缺鮮味但下面件大根就好吃到無論吸盡日月精華般的大根頓成了主角喇~呵呵,法式香蒜焗田螺~亮點在墊底的薯蓉不油不膩又香口超好吃燒翠肉瓜勁甜又多汁,食咗咁多嘢要吃件燒菠蘿解下膩先得~

甜品:芒果布甸麻麻哋,藍莓芝士餅質感對板,特濃朱古力餅巧巧食我要每order多件先肯罷手,車爸爸係雪條狂迷大腳板啱晒佢啦,兩人食到抱著大肚dum咁過情人節晚餐喇~預祝天下有情人愛到天荒地老,永不分離

留言

張貼留言

熱門文章