31 12月, 2016

高質放題火鍋店@鍋心

今年冬季天氣乍暖還寒的真的令人心煩,不過講到打邊爐其實而家春夏秋冬都可以食㗎啦!尤其是早幾日涼涼地打邊爐那條癮即刻出晒嚟!比我發現到間好嘢即刻捉車爸爸陪我去止癮。
呢間鍋心係食放題火鍋的而且價錢相當便宜,17:00-21:30入座起任食兩小時,成人$158/小童$98,21:30-02:00更只需要成人$138/小童$98,就算係星期五,六,日或者公眾假期都係加$10/位,係咪抵到爆炸呢💣。
坐落於繁忙嘅太子道西的鍋心係樓上鋪,經過放滿裝飾品的樓梯,便可到達店內。


內裏光潔新淨配上紫色的梳化凳十分討車媽媽歡心💜,這夜七點鐘嚟到基本上無虛席,好彩我預早訂了檯咋!
而店內有一間小小的Vip房都幾適合5, 6個朋友聚頭,可以舒舒服服自成一角慢慢嘆。
乾淨企理嘅醬料架內分別放有不同的醬料,普遍的辣椒,蒜蓉,芫茜蔥當然會有啦!


但講到最特別嘅就係連新鮮沙薑碎及花椒油都有供應👍。

待我混好個靚醬之後就期待打邊爐時刻喇😋。
差點忘記介紹飲品添!這兒飲品係自助任飲㗎係咪好爽呢!可口可樂,雪碧,韓式特飲,果味酒一應俱全,總有一款啱口味嘅!

車爸爸最愛左面的芒果啤酒,好香芒果味之餘酒味不濃,連不愛啤酒的我都覺得味道不錯。
免費湯底有六款選擇之多,如果睇唔啱嘅話仲可以叫每晚限定的收費鍋底有台式薑母鴨或者高雄九尾雞鍋各$68,而我同車爸爸今日就選咗粟米豬骨鍋喇🌽🍖。
睇下我哋究竟食咗啲咩先,首先係肉類點了黑豚肉🐷,滑牛肉🐂,豬頸肉🐖,鮮雞件🐔和田雞件。


豬頸肉灼後咬口十足又夠肉香十分美味。
田雞件處理得十分乾淨,有肉香味好吃。 
鮮雞件亦富甜味,肉滑皮香質素不俗👍。
海鮮方面我哋點了生猛海蝦,新鮮的基圍蝦肉夠扎實,亦有鮮甜味。


軟滑又煙韌嘅花姿片,火鍋良伴。
即晚推介海鮮今晚係沙白蜆,隻隻都肥美肉厚而且勁鮮甜,我們吃了不少呢!
不過不得不提這兒的魚類選擇又多又新鮮,這個鮮魚雲🐟新鮮得來沒帶半點腥味,好吃到車媽媽lam晒脷喔👅。
而這個係車爸爸的至愛的脆鯇魚腩,件件爽口彈牙,富魚香冇泥味實屬靚貨😋。


另外還有白鱔片都係任叫㗎!知唔知而家啲白鱔幾貴呀!呢度可以飲食真係爽到冇朋友呀😁。
脆鯇腩都咁靚,脆鯇魚片亦都一樣彈牙好味,車爸爸吃得好開心呢。
自家製韭菜鮮肉餃,韭黃鮮蝦水餃都足料非常,味道亦都十分出色,果然有料到呀。


打邊爐梗係唔少得呢啲索味嘅蜂巢豆腐和白蘿蔔啦!


另外還點了鵝腸及豬紅,呢兩款味道就一般,不過口感就一個爽脆,一個 滑溜,都可以接受啦!


當然唔少得新鮮蔬菜吧!我哋點了油麥菜和西洋菜🍀🌿,全部都新鮮嫩口,食咗那麼多肉要食番多D纖維呀😜。
最後整雪糕滿足到不得了呢!不過打邊爐是沒完沢沒了的事,明我又會再介紹另一間火鍋比大家,敬請密切留意呀!


30 12月, 2016

好友冬至聚@潮福

講到蒸氣火鍋大家應該都唔會陌生吧!講到底火鍋好,蒸氣火鍋也好最緊要就係用料新鮮,不過吃一頓有質素的蒸氣火鍋價錢真係唔平呢!
車媽媽今日有好介紹潮福蒸氣火鍋任揀任食任飲海鮮餐$338/位起,每位有滋潤燉湯,有乳鴿或貝殼盛盆,又有生猛龍蝦或刺身拼盤,仲有數款自選海鮮,另外還有不少任點任食的選擇,重要任飲啤酒,汽水,竹蔗水及韓式飲品,您哋話抵唔抵呢?
一上到潮福感覺跟一般蒸氣火鍋店好唔同,裝修好優雅而且地方光猛又乾淨。






魚池內擺滿各式各樣生猛游水海鮮🐟🍤🐚🐙,見到都流曬口水呀😋。
今晚一行十人預早慶祝冬至,真的十分十分熱鬧好開心呀😄。


首先揀選粥底有兩款選擇,新鮮排骨粥或者瑤柱鮮淮山粥,識食梗係揀後者啦,用上珍珠米出來效果應該好綿滑。
任食套餐內還會每位贈送滋潤燉湯一盅,有三款選擇西洋菜生魚燉陳腎,老黃瓜燉排骨西洋菜今日沒得選最後全部揀姬松茸燉螺肉,燉湯味道幾清甜仲好足料呢。
另外每位客人都會送上脆皮乳鴿半隻或貝殼盛盆🐚,乳鴿幾好肉又入味,肉嫩多汁好好味喔😋。
 貝殼盛盆內在花甲,花螺和青口,全部都新鮮非常,味道鮮甜喔!
還有刺身拼盤,生猛龍蝦半隻二選一,我哋選了生猛龍蝦,隻隻肥大肉厚,質感爽彈,味道鮮甜。




而且每位客人更可以選擇四款海鮮,生猛海中蝦🍤全部都好新鮮,蒸熟後肉爽味甜。
另外仲有美國桶蠔同埋北韓象拔蚌,前者Creamy後者爽脆鮮甜可口。
呢隻北韓鮮鮑魚蒸熟後非常軟淋,加了蟲草花後味道更加吸引。
還有北海道北寄貝都係鮮甜味美之貨色,加上蒜蓉粉絲蒸令到北寄貝更加惹味好吃。




蘇格蘭蟶子皇蒸至剛熟的蟶子皇入口爽脆,味道勁鮮甜真係好好味啊~
最後仲有大元貝隻隻好似我一樣肥大肉厚,今晚食咗咁多海鮮真係十分十之滿足呀😚
以下食物就係任點任食之項目,不過食咗咁多海鮮之後其實都真係好飽下!這碟係好友們的手切和牛肉和手切和牛粒🐂,嫣紅的肉色挺吸引。
仲有蟲草花清遠雞🐥和順德污糟雞🐣,雞肉都幾嫩滑好吃㗎!
另外還有特別的手打梅菜豬肉丸,手剁鮮蝦丸,我試過蝦丸都幾爽但彈喎。


最後梗係要扮健康吃D蔬菜啦!最後食埋個蒸馬拉糕就真係十分滿足喇,呢一餐冬至聚個個都食到肚滿腸肥,寄望明年我哋可以能夠再聚呀😍!
嚟緊一連兩篇也是火鍋特集,有興趣的朋友要留意喇!