平凡快樂生日天

車媽媽今年十分感恩得到不少好友愛錫吃了多場生日飯，好滿足好快樂啊！！

生日的那天本來預備到南丫島一日遊，可惜那天早上雨勢頗大又一次要取消，那便轉戰葵芳商場啦！先到靠得住粥麵小館吃過早午餐先(^_-)，不過要一提此店服務態度很不濟，先係有檯唔比客(得我倆在門口)到頭來等了5min才叫入坐，但內裡只有四，五檯客而且侍應有最少三人。

叫餐時仲差個個見到扮睇唔倒仲要黑面的，最後有位男店員拋下一句等陣，過了一陣終於肯幫我哋落單！此時我們已坐了差不多15min喇。

生日要和氣算吧食嘢啦！頭盤要爽脆鯇魚皮，而混醬腸粉係精選套餐的小食。

{爽脆鯇魚皮}$46車爸爸好like食佢，鯇魚皮無疑爽脆，但沒有任何味道像吃橡膠般no good！

{混醬腸粉}咬口好足因為比坊間肥美，但亦因此感覺太硬實，可幸混醬加芝麻挺香才能過骨。

貪心D要多份四拼盤$62，內容有味道普通的麻辣小黃瓜，正常味道的蒜泥四季豆，貢菜海蜇頭用上青花椒油泡製味道很好麻香滿滿，但那海蜇頭碎到夾也夾不起叫人情何以堪啊~最後呢幾件花雕雞，大家看到有什麼不妥呢？三件雞有一件白雪雪的，這也算吧當佢防曬搽得足，但雞肉鞋過我腳板底，花雕味亦不足很難食囉！！

精選套餐{雲吞麵配混醬腸粉}$52，份量挺多，麵質爽彈，梘水味我覺得多了點，湯頭味道算鮮味。

而雲吞皮夠薄，餡料很豐足，內裡蝦肉彈性不俗亦帶鮮味不錯。

{黃沙豬膶粥}$39粥底質感綿綿的米粒不少，可惜*師傅*味太重嘥晒碗粥呢！

豬膶處理得有點over吃下太鬆欠缺應有的粉淋口感！這店第一次幫襯坦白講應該冇下一次，唯獨最滿意係那壺蘋果茶$3/位，香甜可口沖了兩遍亦很足味。

吃罷師傅粥真的好口渴行去葵涌廣場睇下有咩飲先，行經呢間告白果屋靚仔店員大大聲介紹他家的果汁全天然絕不加糖，好吸引喎！

他還說試業期間Like FB和Follow IG便可享打了星星的四款飲品buy one get one呢！最特別係{青出於藍}和{恐龍遇上噴火龍}前者有貴價的羽衣甘藍，而後者有恐龍蛋打汁，都咪話唔新奇。

選好飲品等待期間影吓店鋪的擺設，充滿田園風光的裝飾，簡約舒適。

等了約10min便飲到這杯{恐龍遇上噴火龍}原價$43，現在只須$21.5就可享用。

賣相紫紅充滿魅力紅肉火龍果應記一功，杯上貼上數片香蕉作裝飾，又添多一份美感。

味道真的十分天然,而恐龍蛋味挺出，加上提子和蘋果的香甜真的很可口，喝下很清爽解渴真到家。

在廣場內行街時已看見不少手卷店，最後選了這間問卷手卷專門店吃我大愛的海膽手卷^0^

手捲種類非常繁多，想食生嘅又有熟嘅都有，再唔係葉問都有得食。

等了五分鐘就攞到我嘅海膽手卷啦，講到明用上半板嘅馬糞海膽，果然足料非常啊～

多謝謝爸爸嘅浮誇表現出海膽有幾咁澎湃＝0＝

吃下海膽都算甜，但帶少少苦澀味，反而紫菜就很讚呀鬆脆可口,而醋飯亦挺軟熟，以35蚊嚟講ok啦！

每次到葵涌廣場都要到輕鬆一下吃它的魚蛋。

今次仲試埋佢哋嘅煎釀三寶㖭！我哋揀咗矮瓜，青椒同魚蛋，質素亦算不俗呢！尤其是青椒起碼係熟嘅，我食過好多出面嘅檔口件青椒係生勾勾的！

而佢嘅魚蛋質感好煙韌又有咬口，有魚味得嚟又唔腥，佢嘅辣魚旦仲係麻辣味添好正㗎^_^不過記得上次車爸爸食到滴晒汗，所以今次唯有要唔辣嘅魚蛋啦，不過同樣好味道的*^O^*

另一目標就係呢間冰砂榴槤大王，車媽媽十分愛吃榴槤，不過唔係自細愛食，事原生完BB後胃痛得很緊要，連自己的薑醋也吃不下，那時車婆婆便叫我試試吃榴槤，怎料吃好胃病之餘更吃上癮來呢！

除咗冰砂外原來榴槤大王仲有一啲榴槤酥餅賣，亦都慷慨哋放在櫃檯上供客人試食，不過太飽嘅關係我同車爸爸都冇試到呀！

冰砂榴槤大王的雪花榴槤可選不同的榴榴槤品種，有貓山王，D24同金枕頭,喜歡嘅話仲可以加雪糕添,而且仲有得試飲完才order,認真老實。

最後我哋決定要貓山王榴槤冰砂，一落再order店東就即刻攞出佢嘅榴槤蓉跟冰打成冰砂給我們享用。

呢杯冰砂榴槤味道好香濃，不過口感絕非幼滑之輩，因為佢內裏仲有點點嘅冰粒，挺有咬口喔！！

雖則我真係好飽但係呢間避暑山莊都係我嘅target之一因為真得好喜歡佢嘅膠袋飲品(^_-)

在雲雲之中我揀咗我最喜歡嘅紫色飲品銀河星空$30，其實係荔枝檸檬味梳打飲品來的。

其實味道沒多特別的，最主要係個膠袋真係好吸引客人坦白講只會是一次囉！

葵涌廣場真係多咗好多新花臣，今天同車爸爸走了這一轉又飲又食好happy，行到潮流廊二期見到呢間Little Jobs有個噴煙小吃龍霧，見到年青情侶玩得不亦樂乎，我哋兩個中坑亦都玩埋一份啦！

付款後店員為我們即席泡製這杯龍霧$28，將粟米波，格仔脆片放入特製嘅化學物中伴勻，便可食出噴煙效果

本來還有芝士圈的，可惜太受歡迎已售罄喇！

其實都係小食一杯，不過吃下有噴煙效果真係好好笑*^O^*我同車爸爸玩到癲咗呢。

講真啦這天如果冇肚痛就真係好彩，確係唔怕死嘅我倆仲要喺1830s Macaron食埋雪糕馬卡龍先肯罷休呢！

自選一款馬卡龍及雪糕，另可揀多兩種配料售價$38。

馬卡龍選擇好多，有芝麻街主角，三眼仔，鬆鬆熊，麵包超人仲有winnie the pooh！！

而雪糕嘅口味的八款之多，店員話係意大利雪糕來的！有綠茶，曲奇，朱古力，士多啤梨，益力多，芒果，雲呢拿和荔枝。

最後揀咗Elmo馬卡龍,而雪糕就配在荔枝味，加埋兩款脆脆嘅配料，呢個好似電咗髮的Elmo就誕生喇！

先試咗配料先揀咗一啲彩色嘅脆粒，吃下有啲似早餐嘅脆粒般，而馬卡龍質地未算鬆脆，可幸甜度不算高，而荔枝味嘅雪糕奶味偏重，不算太對我口味呢！