美化工程

車爸爸棚靚牙由上月開始進行大型美化工程，所以近來成日會喺西環附近搵吃早或午餐，之後便到靚仔表弟牙醫處進行美化工程。

上次重溫了周記，這天想吃茶記，車爸爸就帶咗我去石塘咀街市的美味坊吃午餐。

餐茶都係例牌凍檸茶少甜和熱奶茶，味道尚算不俗，而且喺呢度飲零舍有風味！(凍檸無須加＄超正)

車爸爸點了謝安琪餐！哈哈即係B餐$34囉，只有一個通粉就係鮮茄菠菜牛肉通粉。

湯頭十分清甜沒有一絲味精的蹤影，而菠菜同鮮茄則十分鮮嫩，車爸爸話牛肉亦都十分不錯，沒有乸成沒味的死屍肉。

而我就點了徐濠縈餐A餐$30，我就比較豐富喇！呢個餐有一個單餸出前一丁麵，可以揀雞絲，火腿，腸仔或餐肉，而我就要了最邪惡的餐肉出前一丁麵。

最正嘅係出前一丁哪個麻油包，係擺在檯面任大家隨意去取好慷慨呢！不過又好好笑喎，個麵底未落麻油前竟然係福麵的味道，但係落咗麻油之後又變番出前一丁呢味真搞笑！

而我嗰餐點解豐富呢？因為仲會有一個煎蛋同埋厚多士，太陽蛋煎得完整盪漾，蛋味都算不錯。

牛油厚多士就略為烘得不夠香，可幸夠脆身，但看見厚厚的多士，又確實真係幾開心嘅^_^

吃飽飽就要捉車爸爸去整牙喇！唔好扁嘴啦好快搞掂就會靚仔晒，又食到好多好嘢㗎喇！

呢個就係我表弟嘅牙醫診所喇，好多人試過都話佢手勢唔錯㗎，當然包括我在內啦，所以車爸爸你放心啦可以交託比Dr.Dustin(^_-)

做完美化工程之後我哋就返荃灣探車公公車婆婆，行過呢一間Baker Talent麵包店見到有有榴槤麵包買喎！當然要買個返去比愛吃榴槤的車婆婆試下啦！

麵包店嚟講佢哋嘅裝修亦都算有心機挺骨子啊～

而麵包櫃亦都衛生企理，那裏有不少特別款式的麵包可選，而且係即場新鮮出爐呢！

我就二話不說買了兩個榴槤麵包$12/個。

麵包嘅質感都幾鬆軟，而內裏嘅榴槤餡都香濃好味，不過就略嫌榴槤餡太少了！