動感晚餐

大家喜歡音樂嗎?車媽媽最愛一人時帶著耳機聽著心愛的曲目(當然是皇上的妙曲吧!)喜歡聽著他那令人毛管躍動的歌聲,沉醉於曲詞中的世界亦可令我暫卻忘憂!

這天相約麵包超人及Candy同到HMV Kafé晚餐,飯前被近期火紅的HMV Dog $5熱狗吸引著,忍不住買了一隻來一探虛實!
除了超抵的五蚊雞熱狗外還有另一款Canadian Hot Dog$12,和超抵飲的Asahi生啤講緊一Pint都係$30/Half Pint$15,唔係講笑來這兒Happy Hour真係抵過酒吧好多囉haha~
好喇睇睇隻熱狗究竟有幾抵食先!流程十分之快比完錢後即時遞到您手上,所以你唔好諗住隻熱狗會熱辣辣呀!
Hot Dog在左右兩邊分別放了普通及加拿大熱狗的醬料配料,收銀處左手邊會擺放蕃茄醬,芥辣醬,千島醬以及酸瓜醬給客人無限添上熱狗中,開心C我因為我最鍾意就係食酸瓜醬㗎!
而右手面就係另一款加拿大熱狗的配料,這兒包括有以上四款醬汁外還另外有洋蔥,肉醬,粟米及紅黃波椒,同樣是無限添加都真係好鬼爽㗎!

講返呢隻五蚊熱狗其實包身面層都幾脆口,但包底有少少水氣所以有點淋淋的,熱狗腸唔會將價就貨大大條脆皮到不得了,內裏的肉質亦唔會霉淋又唔太鹹,配上醬汁及酸瓜總是美味的實在係太益食家了!!
 吃完這麼便宜又好味道的熱狗便拾級而上到四樓的HMV Kafé ,期待跟友人吃頓動感晚餐,皆因這夜有Live Music表演。
已是第二趟到來環境跟上趟沒兩樣,仍是給人一樣輕鬆自在的感覺。

人未到齊先喝一杯Mocktail吧!在芸芸中選了Autumn$68由荔枝,橙汁,紅莓汁混合而成味道芳香怡人,內帶滿滿的新鮮橙肉喝下香甜味美又解渴。
我們仨也是喜歡飲酒的人,看見這個Beer Platter連同7款小食都只係賣$178,咁鬼第三個人絕對可以KO啦!就點了一Set來試試吧!
上檯時賣相都幾震撼好睛!每杯啤酒容量約200ml其實飲曬佢都唔係真係好多啫!
7款不同種類的啤酒並列有選擇困難症的朋友就認真大件事啦!不過啤酒對我嚟講唔算十分喜好,但係有一杯我一見到就已經心花怒放!這杯就是Hoegaarden Rose,毫不客氣的要了這一杯甜美味啤酒了!
另外廚師還會精心挑選7款不同的小食配搭這個啤酒拼盤。
當中有洋蔥圈,炸Mozzarella Cheese,肉腸,炸春卷及炸蝦,全部都係送酒佳品,邊吃邊喝真的十分爽皮呀!
來大家乾一杯乾一杯恭祝友誼,一開始一開始不可以終止,朋友一世係朋友Yeah~
咁多款之中最特別就呢款炸Mozzarella Cheese,撕開真係有拉絲好療癒好過癮㗎!!
另外還點了邪惡的黑松露炸薯條$68,薯條超粗大條好鬼誘惑,配上香濃的黑松露沙律醬簡直係魔鬼的化身呀!最終我哋吃至一條不剩哈哈哈......

品嚐完這麼多美食後係時候點菜了,餐廳推出逢星期日至星期三晚餐時主菜買一送一,但要同時最少點一份前菜,餐湯或沙律先可享有以上優惠,點解而家食飯咁鬼抵食㗎!
那便要點前菜先啦!麵包超人喜歡食沙律他揀了田園沙律配車厘茄巴馬臣芝士及陳年黑醋$96,沙律內有不少紅白蘿蔔片及爽口的沙律菜,還有慷慨的Parmesan Cheese大大碟都幾抵食!
Candy就喜歡食魷魚所以點了這個燒魷魚配羅勒香草醬$88,魷魚未算十分鮮甜頗具咬口,配上了羅勒醬加添了香氣不妨一試!
而我就最鍾意食貝殼類海鮮,所以點了這個燴鮮蜆伴薑味脆包$138。
還有三款醬汁可選包括藏紅花忌廉汁,香辣鮮茄醬及蒜香白酒汁,而我們就點了蒜香白酒汁,蜆肉十分飽滿肥大肉厚充滿海水味道又冇沙,配合香甜的白酒汁吃下很滋味,如果白酒汁可以再多一點應該會更加吸引噢!
餐湯有兩款選擇那便就叫齊來一同分享吧!這個是傳統雜菜湯$72。
青綠的湯色感覺十分清爽,內裏充斥多款雜菜喝下去層次感很豐, 而味道則較為重口味了一點!
而另一款是煙茶龍蝦湯$88,精緻的茶壺放著了濃濃的龍蝦湯,上檯時侍應才將它倒進放有魚肉的容器內。
這湯味道極之濃郁喜歡重口味的朋友相信會喜愛它的味道。
之前的Appetizer及餐湯都吃得我們十分滿足!所以主菜只點了兩款這一款是龍蝦湯煮鱸魚配海鮮及酸菜$268,上檯時被它的霸氣賣相深深的吸引著!強烈推介大家吃這一個主菜。
因為用了龍蝦湯浸著的脆炸鱸魚入口嫩滑非常,沒帶丁點魚腥味,內裏還有不少青口大蜆作調味,最特別的還中西合璧加入了酸菜竹笙在內,索盡鮮甜海鮮香氣的竹笙真係美味得沒話說!
而另一款是煎大蝦煙豬頰肉卷伴黑野米及青咖哩泡沫$188。
大蝦給薄薄的豬頰肉痴纏地捆在一起,煎香後淋上青咖哩泡沫吃下去大蝦爽甜彈牙肉質鮮嫩配上肉香好吃非常,伴旁的是加拿大黑野米對於吃慣軟熟白米飯的我當然不是我杯茶,但聽聞他的營養價值十分之豐富呢!
來到甜品環節我們都選了兩款來一同分享,包括有Chocolate Salami$70,而另外一款是Coconut Iced-Pops$68。
Coconut Iced-Pops由菠蘿湯,椰子雪條,帶少許分子料理的玉桂味魚子醬,配上鮮芒果合製而成絕對是一份誠意十足的甜品。
那個椰子雪條已切成粒狀方便入口而且富有極香濃椰子香氣,另外這個玉桂魚子醬真的很特別可惜車媽媽不喜歡肉桂味,但最後的那個菠蘿湯就真係十分美味菠蘿迷的我愛喝到不行呀。
而這個Chocolate Salami顧名思義杏仁朱古力就是莎樂美腸的甜品版,這甜品還配上一球咖啡雪糕及Vanilla Gel,雪糕冰感略重奶味不濃帶點爽口又幾可愛噃!
粒粒香口果仁加上甜絲絲的朱古力Salami吃下去味道很不錯,而且口感挺豐富我蠻歡喜呢!吃飽飽後便打道回府,沿途又想下一次又去那裡聚餐好呢嘻嘻!!

留言

張貼留言

熱門文章