勁食假期

上星期六東涌三美連同身邊的最愛相約吃了一場泰午餐，選了在藍天海岸的My Thai Bar & Restaurant大擦一餐！

星期六那天天氣還是熱焗得很先整番杯荔枝香茅梳打清爽一下先，而車爸爸就揀了泰式奶茶 聽他說奶茶味道十分不錯呢！

食泰國菜當然唔少得冬陰功吧！內有不少大蝦而且十分之足料，味道香辣惹味酸辣度也恰好我蠻喜歡這味道呢！

接下來還有香辣醒胃的青木瓜沙律，另外為了相就吃不了辣的車爸爸點了一個餐廳推介的辣椒膏炒花甲，辣椒膏味道偏甜不辣口，不過這汁醬跟花甲有點兒格格不入的感覺，可幸花甲夠肥美鮮甜又冇沙都算有一點安慰吧！

接著亦是餐廳推介的蠔仔鐵板煎蛋，做得非常香口雞蛋沒有過老，蠔仔粒粒肥美雖然唔算十分鮮甜但已算不錯了！

有個世紀黑洞在當然要點些飽肚的粉麵先來一客泰式炒河，粗身河粉炒得乾身香口但我就略嫌河粉太少料太多了！

另外一份係豬頸肉金邊粉呢個味道沒有十分突出，但內裡的蘿蔔就十分入味好吃呢。

最後更點了一客泰式燒雞還記得上一次來吃的時候驚為天人這次重溫亦是覺得美味非常呢！燒雞醃得十分入味，完全不需點任何醬汁已經十分好吃呢！

吃飽飽午餐之後就同車爸爸去葵涌廣場行街街，不過成個行程都係食食食啦哈哈！先去到這間Circle2見佢大大張Poster寫住買一送一好鬼抵喎！而且見到有我喜歡飲的即製Mojito一於就叫一杯試吓啦。

原來買一送一係買一杯＄22以上的飲品就會送一杯珍珠奶茶，正好合喜歡飲奶茶的車爸爸，不過佢就唔喜歡珍珠所只係要了一杯淨奶茶，先飲我這一清爽的Mojito味道好清新，薄荷葉亦都是新鮮貨甜度調配得剛剛好十分好飲，而且大大杯都只係＄28太過抵飲了吧！

而奶茶亦都分量不少喔！喝下去奶味跟茶味平衡得不俗，而且仲係免費送贈葵涌廣場真係一個好快樂的平民美食之地呢！

邊喝著美味飲料之際我見到這一間Bove有梳乎厘班戟賣喎即時心心眼啦！

原有三款口味的梳乎厘班戟包括原味、朱古力及抹茶味，不過這天只有原味供應而梳乎厘班戟可以配蜜糖或者朱古力醬，想吃得豐富些仲可以配流心餡料添！我哋就揀咗草莓朱古力而加餡料的話還可以選擇一款忌廉而我們揀咗Oreo忌廉！

即叫即製的關係每一份梳乎厘班戟都都需時20至25分鐘才能完成，良久後我們點的梳乎厘班戟終於到手啦！

一客有兩件厚身的梳乎厘班戟賣相像肚紋般有點倒胃，吃下又冇我想像中的那份鬆軟感覺，只像吃芝士蛋糕那種軟綿綿感覺而唔係食梳乎厘班戟嗰種空氣感囉！但係蛋味佢都尚算不俗的，不過內裏的草莓朱古力餡就實在太甜了，如果唔加我覺得味道會更加出色囉！

食完梳乎厘班戟又比我哋發現這間泰風SO！有啲咩吸引咗我哋去幫襯咪就係呢度有我喜歡吃的泰式船河囉！

牆上貼了數款泰式美食包括有泰式船河只係賣＄25好吸引的價位呢！另外還有泰式海南雞船河都係＄30碗價錢真係幾吸引！究竟好唔好味呢不如買一碗你試試啦。

這碗泰式船河用都好足料喎！而且湯頭非常濃厚內還有免費炸豬皮及不少豬肉作配料，而我們則點選了豬肉丸！

深啡色的湯頭喝下去味道十分對版，濃郁香口的味道十分吸引。

內裏還有不少香口的炸豬皮質感鬆脆香口好吃得車爸爸要即時買一包外賣回家呢。

豬肉丸唔會太大粒食落去味道都算不錯起碼沒有豬騷味，一碗有三粒這樣的價錢絕對收貨有餘啦了！

河粉係用上幼身的湯河吃落都好滑溜，這一碗泰國船河絕對吃得過啊~

原來此店在葵涌廣場內有兩間分店，行過另一間分店見到有這款四色芒果糯米飯又係好吸引，雖然好飽我哋都決定買一盒返回家吃，只不過買遲一步本來已經淨返三色點知道最後我哋只能買到兩色回家真係好鬼受歡迎喎！

芒果糯米飯吃落去質感好煙韌軟糯，椰汁鹹甜稀杰調配得相當不俗，蝶豆花糯米飯味道清甜可口，但係原味的不知為何有一股燶味聽聞係煙燻味真的不懂欣賞！而芒果都熟透香甜如果唔係煲燶飯味我都覺得算唔錯㗎哈哈！