久違了的K日

上月尾係我親愛的表弟結婚的大日子！所以星期日的那天我們多了日間的時間去拍拖，車爸爸首先陪我去收眉之後就去食過早午餐，在極度眼瞓的情況下車爸爸要求要吃茶餐廳(因為要飲奶茶)，我當然冇問題啦就選了這一間輕鬆一下跟他吃個大早餐啦！

在眾多食物當中選了這一個蕃茄湯自選套餐，我選了炸豬扒、紅腸蕃茄湯通粉連一杯飲品＄56，估唔到蕃茄湯底又幾有驚喜喎！味道夠濃郁雖然下了不少茄膏但起碼吃罷亦唔會有口渴情況，紅腸顏色好光鮮如果能夠下少少功夫煎兩下就應該更加好食。

另一個餸我點了炸豬扒幾貼心會分開上，而且炸得幾香口吃落肉質都好淋，餐廳貨色都已經叫做合格了！

車爸爸就選了炸雞翼配太陽蛋蕃茄公仔麵＄48，這個蕃茄湯底車爸爸亦都吃得好滿意呢。

而他的炸雞翼好似有少少營養不良真係細隻得好緊要呢！不過買開餸的我亦覺得近年的雞翼真係細隻得太過分了！可幸太陽蛋煎得好明亮總算挽回少少分數！

貪心的我倆更加＄12點多一份火腿奄列加奶油脆豬，火腿奄列做得好乾硬而且蛋都未打勻就用來煎奄列真係好Hea囉！反而個脆豬就烘得頗香脆可口，可惜煉奶流走了否則更美味！

吃飽一個早午餐之後我倆便走進The One想搵場戲睇，怎料想看的戲又冇啱心水時段唯有放棄！沿扶手電梯行落去見到一雪糕店賣Gelato，可惜試味後覺得唔係好啱心水！再落多層就畀我見到Haagen-Dazs，即時記起我有一張雪糕劵未食，便造就咗這個香蕉船甜品在我們的假期內了，要一讚這店有免費座位供應呢可以吃得更舒爽了！

吃罷雪糕都已經差唔多下午四時距離去飲宴的時間還有數小時！我倆都不知去哪兒好忽然間我個腦閃過卡拉OK，一於就走去整場下午茶K吧！

就係咁兩條茂利爆唱到七時真係勁瘋狂好玩囉！講個小秘密你哋知我跟車爸爸第一天認識便是在卡拉OK內！那天總算是回味一下初相識的甜蜜滋味吧！

開心唱完K後就到隔鄰的香港富豪酒店去祝賀表弟的結婚大日子私人宴會就唔多影相喇！不過都要讚下這晚的酒菜做得十分不俗頗有質素呢！