20 11月, 2016

餃得好掂

觀塘延線紅磡站現已開通了,有一天好友約我到紅磡食Lunch,當然義無反顧哋去仆去啦,因為佢話帶我去吃我喜歡的餃子,到達時才知原來係吃日式餃子,這間餃餃餃子 Chao Chao Gyoza早前行經灣仔店已被我留意到,好友真知我心意😚
餃餃餃子 Chao Chao Gyoza不算難找,只要在紅磡港鐵站B出口直行到尾,見到百佳超市就到,腳程3min超近便。


在門口已經看見有各式各樣嘅餃子,而且仲要係寫明係日本直送,車媽媽即時心心眼😍
或許店子新開不久,人流不算太多,不過我們坐下後已陸續有客人進來了。


先看看有咩飲品先,眼見呢度除咗一些日本酒類之外,仲有我最喜歡的梳打飲品,另外一些普通嘅氣水,凍檸茶,凍檸水都有供應。
我跟其中一好友先點上飲品,我就要咗{巨峰梳打}而好友就要了{白桃活乳酸梳打}各$25。
{巨峰梳打}味道似百寶膠的提子味,而且飲落唔會覺得好甜,解渴度不錯,我好喜歡呀。💜
有解渴飲品便嘆住等埋其它好友兼揀埋食物啦!
望望餐牌呢個Lunch Set由11:30-14:30供應,價錢都好抵食,而且午餐係免收加一呢,內有前菜,餃子,烏冬和飯可以配襯好鬼豐富啫,而且最平$65已有交易。
再唔係喜歡食咖哩飯的,這個大勝咖哩吉列豬扒丼+精選餃子三隻,都係58蚊超級抵食呀。
整人開動喇!{自家製香辣青瓜漬}$18,青瓜係爽口嘅而且青味唔算太濃,但係我就覺得唔係好夠辣囉!!


{Chao Chao餃子}$40/16隻,咪以為16隻好多呀!其實佢只不過係一口一粒小巧易吃的,食唔晒可叫8隻都係$22啫。
餃子餡料頗足,肉餡有香味,而且餃子皮好薄身,餃底亦都煎得香脆可口,不過大家記住所有餃子都要趁熱食呀!
另外我們還點了其他特別味道的餃子,呢一個係{激辛餃子}$29/5隻。
同樣係煎至香脆可口的激辛餃子,內裏加了辣的味道增添了層次,不過對於我這個辣媽來講只係BB辣,但整體味道都係香濃咗的。
仲有這個十分好玩的{Shake Shake餃子}$38/5隻,我哋揀選了香港限定的粟米濃湯味,另外還選了梅子鰹魚味來試。
其實同麥記嘅Shake Shake薯條有異曲同工之效,只要將炸至滾熱辣的餃子放入味粉,然後出力搖勻便成Shake Shake餃子喇。
兩款當中我比較喜歡香港限定的粟米濃湯味,真係好鬼似粟米湯的味道,太過癮了吧!而且餃子唔係煎而係用炸的出來效果更加香脆可口,不過當然同時間亦比較邪惡D啦。👿
而另外我們還點多兩款創新的餃子嘗試,呢款係{雞肉芝士餃子}$38/5隻,從來有芝士的食物都易令人傾情,咬落芝士味香而不羶,加上煎到香香脆脆嘅餃子,又點會唔令人傾心呢!💖
仲有一款好鬼特別嘅係{洋蔥餃子配意大利芝士蕃茄蓉}$48/4隻,用上意式芝士加蕃茄配搭在餃子面頭一齊食,酸酸香香的滋味好特別,呢個可以一試呀!
車媽媽一見到這個{日本蟹肉忌廉薯餅}$22/2件便讓著要吃,上檯時熱辣辣,外皮炸至脆卜卜,內裏充滿軟滑的蟹肉忌廉,咬下既滋味又邪惡呢!
差一點忘了介紹這個最正嘅特色創作餃子,呢個叫做{雞翼餃子}$48/2隻,將雞翼去骨後釀入餃子餡在內,炸出的雞翼餃香脆又入味,出奇地吃下全無油膩感,這個係車媽媽係特別推介呀。👍
這兒除了十分多不同口味餃子外,其實係仲有飯同烏冬食㗎!而我就選中了{日式鰻魚飯}$65,呢度出品的鰻魚飯我覺得絕對對得住佢嘅價錢,首先日本米煮得軟熟恰好,還加有大量香而不乾的蛋絲,再加上一件豐厚香甜的燒鰻魚,我表示十分滿意呢。😊

4 則留言: