22 11月, 2016

心私私,榮哥有請!

有一天好友問我去唔去搵榮哥,心諗我唔識豬肉榮㗎喎!原來好友口中所提及呢位係榮哥廚房私房菜,那便要去探吓呢個唔係買豬肉嘅榮哥究竟有何魅力,要我這位咀尖嘅好友都要去幫襯它。
一行入餐廳便見到這座奪目的水耕菜架,估唔到榮哥係一個咁著重新鮮材料嘅男士又幾有心喎!
店內有不少魚缸除了龍吐珠外我還看到一些自己釣回來的海魚,他們亦珍而重之的將他們包養起來,原來有人同我一樣咁傻的,以前我同車爸爸成日去釣魚,釣到一啲細細條嘅魚我也會將它們養起呢!
先來一壺水仙這兒用的是不銹鋼壺,好像在中式餐廳有少少格格不入呢!
侍應生千叮萬囑我們不要將滾水泡過茶葉面,只要輕輕浸住便可以,真的奇怪乜唔係要搵水浸住茶葉先出味嘅咩??
當我跟好友滿腦子疑惑時,呷一口水仙我哋便恍然大悟了!只要輕輕浸泡茶味已經很出色,而且這茶葉比起很多星級食肆來得更加高質,講緊榮哥只係收$12位茶錢咋,可以有如斯享受我覺得我好幸福呀!仲有呀如果你比Cash埋單仲可以免茶添呀。
嘆完一口靚茶後,我們吃的是{精心配·伴二人餐}每位$328,率先上檯的前菜有{保健秋葵真味},{涼拌黑木耳}和{有機沙律伴芝麻醬},有機沙律菜新鮮清甜,伴以香口芝麻芥末醬爽口刺激好美味,而涼拌黑木耳都挺爽口入味,酸酸香香的令人胃口大開,但我最愛嘅就係秋葵同樣用上芝麻醬,我覺得這配搭十分合襯。
前菜還有這款{茶燻流心蛋拌黑魚子醬配厚切茄子},顏色嬌豔奪目而且係我最愛的紫色,見到都已經令我心癢不巳!
流心蛋糖心未算十分澎湃,煙燻味都不算十分濃厚,反而墊底辣件厚切茄子,中正車媽媽的心水,索盡香濃汁料的茄子,吃下軟滑又香甜十分吸引。


接著係原盅燉湯而且仲供應兩款呢!這是{川貝陳皮海底椰鱷魚肉湯}, 這湯清甜甘香,而且我知道所有材料對氣管敏感及咳嗽人士十分適合,雖然我冇呢個問題但係我都好喜歡這湯呀。
另一款係{哈密瓜螺頭黑毛豚肉湯}用上黑毛豬嚟燉湯還是第一次喝,帶有 蜜瓜香甜的燉湯味道都挺夾,不過我還是喜歡鱷魚肉湯多一點!
接下來是{蝦球水芙蓉},還記得去年在雲來軒跟加國好友海豚兒的餞別宴上吃過這菜,這兒的出品絕對不下於雲來軒啊~
誘惑無比的蛋白滑溜勝雪,載著一顆鮮甜彈牙的蝦球,和充滿香氣的醬汁,不止賣相吸引連食味亦都十分出色喔!
{冰梅黑豚肉排骨},話個秘密比大家知吖車媽媽由細至大都好喜歡食冰梅醬的這個骨啱晒我呀!肉排淋香易嚼再加上酸香的子薑條,令層次感豐富不少。
這個{蒜香極佳級Prime牛仔柳},車媽媽無緣享受不過我都包咗返去比車爸爸享用,見他吃得十分開心味道應該很不錯耶。


接下來這個{鮮魚湯浸碧綠溫室菜苗}令我跟好友都充滿驚喜呢!
先呷一口魚湯濃稠沒腥味,喝得出用上很多魚來淆製而成,而溫室菜苗亦沒有我們一般吃的腥草味,吃下只會感受到香甜清爽的感覺,這菜十分之出色,令人一試難忘!!
最後單尾來個{荷香蒜蓉海斑片原籠蒸鴛鴦飯}。
所謂鴛鴦飯其實係白米加上紅米,這樣吃法會比較健康,米飯質感乾爽,最緊要係吸盡魚香百加上蒜蓉同香蔥,簡直令人不忍吃剩一粒米飯呢!!
吃完主食還未完的仲有{甜蜜美滿慶團圓},這個甜品雙拼內有芒果雪糕和炸紫薯波波。
紫薯波波的紫薯味就真係唔算出眾,不過熱哄哄的炸出來又不油膩,吃下還是滿足的,而且甜度不會太過呢!


另外呢球可愛嘅芒果雪糕質感都幾滑溜㗎,亦都有芒果味,作為這餐嘅完結都好稱職呢。

4 則留言: