羅家飯

羅家飯好耐冇同大家見面喇,為大家介紹下我近來煮咗啲咩餸比車爸爸食啦💁。
這夜想清淡一些買了墨魚滑🐙和蝦滑🍤做了味鴛鴦滑釀豆腐,有咬口得嚟又香滑又有益,而且用來送飯都幾唔錯㗎。
好耐冇蒸蒜蓉茄子🍆蒸番餐茄子食下先,見到街市有呢一種手指茄係我最喜歡食的品種,因為佢個皮好軟滑,唔會硬掘掘用來蒸最適合不過。
另一夜嘅晚餐我哋就食燒春雞🐤,再加埋喺村姑度掘番嚟嘅芋仔,加多碟 白灼秋葵 簡簡單單又一餐!




芋仔好香好滑好好食,真係要多謝清麗村姑呀😚!
不過今次啲秋葵有少少過老,好彩都仲未去到有渣。
燒雞🐔就好簡單隔夜醃定味,跟住焗熟佢噴少少蜜糖已經係人間美食了。
上個月都有幾日凍凍哋當然要打吓邊爐啦,為食貓車爸爸一聽到打邊爐就話要食醉雞鍋喎!好啦唔怕流鼻血咪整咗比你食囉👃!
超足料的醉雞湯底聞到都覺得香呀,不過食完我就起咗好多粒痱滋囉😢!冇辦法車媽媽係燥底人士,不過為咗老公就豁出去吧!
呢一隻肥牛車爸爸最喜歡食,價錢都唔平呀要100蚊一磅💸!
另外仲有佢最喜歡嘅脆肉鯇🐟,今次買到的魚肉紮實又彈牙,吃得車爸爸十分之滿意。
打邊爐食得幾隻餃懶得自己包,叫車爸爸外賣樓下那間珍珍美食店的一打 雲吞加韮菜餃,這間美食做法好主家,所以味道好真實有時懶懶地幫襯佢都唔錯㗎。
見到這個黃金蚌外型十分之美麗咁就買幾隻愛嚟打邊爐啦,不過食落我就覺得冇貴妃蚌咁鮮甜,而且韌度較高口感味道也麻麻地!
炸魚皮係樓下金銘粉麵的出品$12一包仔,都算輕脆薄身而且味道亦都不錯。
醉雞當然有鮮雞一大隻啦🐥,一早就用花雕酒醃到入味🍶,吃起上嚟充滿酒香味道確不同。
最後買咗啲西洋菜和白蘿蔔,兩樣都係我哋最愛的蔬菜。
醉雞湯食烏冬實在太相襯了,不過記住要食真打烏冬先好味㗎haha~


睇下車爸爸食醉雞都唔夠,仲要整多罐king Can啤酒🍺話咁先至很到入型入格喎😏!
呢餐係做冬晚餐當然要豐富啲啦,意頭我都攞足煮咗笑哈哈即係椒鹽大蝦碌🍤,年年有餘就買咗條美味到不得了嘅芝麻斑🐟,另外最後代表金銀滿屋的鮑魚豆苗🍀。
呢條芝麻斑美味道度係十粒星星✨咁多呀,蒸熟之後魚味香濃又嫩滑,好吃得連車車🐶都話正呀。


鮑魚好簡單只不過係用即食鮑魚,將汁用來餵煮豆苗,美味簡單又矜貴。
椒鹽煎蝦碌就更簡單,最緊要夠乾身煎到香脆後加椒鹽,已經好吃得吮晒手指啊~
做冬當然要食埋薑汁湯圓,希望大家都開開心心,團團圓圓,快快樂樂啦💞。


較近期嘅一餐車爸爸忽然間話要食蝦醬蒸豬肉🐷,我就整多個什級版蒸豬頸肉啦!
蝦醬蒸豬頸肉真係好鬼好餸飯,少少辣椒落去鹹香微辣更惹,加上爽口豬頸肉真係吃到停唔到口㗎!不過呢味真係間中食下好啦好鬼肥㗎。
早前喺工展會買咗樽好香的黑松露醬,當然要發揮佢所長整返個黑松露炒滑蛋🍳,炒出嚟成間屋都香噴噴,車爸爸食到流曬口水呢😋。
邪惡完梗係要食番啲健康蔬菜啦,而家啲芥蘭真係冇乜菜味,不過都算夠淋又冇渣。
而生果我用黑松露醬同埋梅粉配襯西瓜🍉一齊食夠刁鑽冇haha~
大家會喜歡邊一樣多啲呢?車媽媽重口味就喜歡黑松露西瓜多啲,爆大冷嘅係怕酸的車爸爸竟然喜歡梅粉西瓜喎!
今年嘅天氣真係冇乜真正凍過,等咗好耐最後終於係好熱嘅天氣下煮咗呢一個殘忍飯。
今次整白鱔排骨煲仔飯🍲,其實係屋企煮煲仔飯絕對唔難事,只要米水控制得宜,同埋放生料嘅時間預計得啱,成件事出嚟一樣係有飯焦,一樣係咁香噴噴好食㗎。




留言

張貼留言

熱門文章