不一樣的羅家飯！

從今起羅家飯有點不一樣因為以後只會剩下我跟車爸爸食，雖然現在已沒有車車在旁！但我還是覺得他常在我身邊！

先介紹這一夜沒有車車後的第一餐羅家飯！

車爸爸指定要吃豉油皇雞翼，大家有冇發覺現在街市的雞翼細隻到不堪！我就轉去超市買了這款法國雞翼，身型確實較健碩可惜肉質較為粗嚡！唔係我哋杯茶囉！

買了一對黃花魚魚肉鮮甜得很海黃花確實比較美味，價錢貴一點也很值得吃。

清炒多啲油麥菜一餐就輕易煮起來了！！

另一夜就蒸了一碟蒜頭豆豉排骨，都好耐未煮過蒸排骨了今次試了新的本地豬肉檔買來的腩排。

排骨吃下肉質很軟熟夠晒淋滑，肉味挺香沒有丁點豬蘇味，質素很不錯吃得過呀。

煮一碟黑松露蒜蓉茄子，茄子夠曬香甜不過配黑松露有D格格不入，下次再試第二種煮法先得！

這一夜車爸爸點選要吃豉汁煎倉魚當然冇問題啦！即刻買咗條肥美的黃立倉整比佢食。

夏天正是食瓜係時候整番個瑤柱炆節瓜，香得來又清新夠曬正氣呀！

豉汁煎倉魚煮法好簡單只要撲粉將倉魚煎香，煮番一個豉汁打番落魚面便完成這個惹味的豉汁蒸倉魚啦！其實煎魚冇乜竅門熱鑊凍油加上不要不停反魚便可煎出香口又完整的靚魚來！

早前翳焗的天氣令到車爸爸胃口不是太好！咁我就要諗諗辦法整D醒胃菜式，咖哩相信應該好合佢心意呢！

買咗一隻鮮雞用來煮泰式紅咖哩雞，加入洋蔥及薯仔已是美味的開胃菜了！

車爸爸唔開胃咁就唔煮飯啦！整番個香口的薄餅母佢點咖哩吃，果然不出我所料吃得他十分開懷。

經過魚檔比我見到這條新鮮的油錐又忍唔住買咗條返去吃，簡單的用蒜頭豆豉蒸已經十分美味，油錐皮爽肉滑鮮味超足好誘人喔！

而第二天要吃回剩下的少許咖哩雞！另外將其餘半隻雞用來做燒雞，加一碟美味的椒鹽秋葵咁又變為一餐美味的餸菜喇！

醃足一日一夜的半邊雞用焗爐烤香，皮香肉嫩的燒雞車爸爸極度欣賞呢！

秋葵我必定要買泰國貨因為大陸貨真係好難食！最喜歡將它灼熟加上麻醬，不過這次灑上味椒鹽更見惹味啊！

喜歡吃魚的我倆真的餐餐吃魚也不厭倦！而我好好彩因為我家街市有一老實的魚檔，很喜歡跟他們買魚吃因為它的烹全部都係海魚零舍鮮味，而且他很知道我吃魚的心水呢！

我平時係好少會買切開咗的魚，但係魚販跟我說這石班十分靚仔，那我就信她一次啦！這石斑果然美味非常，魚皮滑嘟嘟魚肉又嫩又鮮甜，車爸爸都吃到舐舐脷呀！

白灼蘆筍質感還不赖可惜欠缺應有的清香味道嘥＄！！

6月12號八號風球的晚上早在三號風球時到了金鐘嘆下午茶，怎料忽然間五點多便掛上八號風球，走時去到香港站人龍竟然塞了半個鐘頭還下不到月台！

最終我放棄了回家在香港站的Starbucks坐了兩小時順便等埋車爸爸收工，之後一同到Citysuper買我們的結婚週年紀念晚餐材料。

沙律我買了七彩繽紛的車厘茄，火箭菜以及苦白菜，配上芥辣味芝麻醬，味道十分之相襯而且所有蔬菜都好新鮮，連車爸爸吃得超爽！

車爸爸揀選了澳洲西冷扒，他的評價肉質十分淋滑有彈性，不過牛味還是未夠濃郁！

而我則選了西班牙Iberico豬鞍架，此豬充滿驚喜不論肉質和味道亦都是上上之品！

煎至剛剛屬熟的豬鞍外面脆口內裡Juicy，豬肉香氣味出眾吃下口感美妙，碓是一件美味度超高的豬鞍架。

最後整多一個芝士焗薯蓉咁就夠曬飽肚啦，用上焗薯加入巴馬臣芝士，牛奶及牛油肥美度爆燈！

吃飽飯之後還有甜品喔！因為今天除了是我倆拍拖加結婚週年紀念外還是我們的寶貝細佬Wagon的生忌啊！

好彩回到東涌這間新開不久的Le Fournil仍在營業，原來此乃一間法式中高檔餅店，店主還顧用了更生人仕作員工，背負社會責位意義甚大更值得幫襯。

打風的日子選擇無幾！只剩下宇治綠茶意大利芝士卷及熱情果紅桑子蛋糕！

當然要比咗寶貝細佬Wagon嘆咗呢個熱情果紅桑子蛋糕先啦！

賣相相當美艷動人熱情果紅桑子蛋糕＄46，紅絲絨的外層鋪上少許金箔點綴高貴迷人。

切開中間內裏有恰好的熱情果內餡酸甜味適中，加上香脆的praline feuilletine口感味道也很是迷人！

另外這件宇治綠茶意大利芝士卷＄35，坦白講我覺得蛋糕的位置不夠濕潤較乾，內裏的綠茶Mascarpone兩者味道都得不到平衡有點唔湯唔水呢！這一件就真係麻麻地啦！但我還對這店滿帶期望，下一趟再試埋其它甜品及將有賣的雪糕呢！