03 10月, 2017

喜慶羅家飯

今天這幾餐我羅家飯都包含著一些喜慶日子!包括車爸爸的生日飯和中秋節羅家飯,希望大家明天都過一個團團圓圓的快樂中秋節吧!

有留意我Facebook的朋友都知近來我經常都幫襯街市內的霸王蟹買生蠔,由第一次試到三嚐 質素亦十分出色,當中亦包括有法國品種及荷蘭品種,像這天車爸爸的生日晚餐吃的正是荷蘭佳麗估唔到質素都十分出色!有著法國蠔的濃郁味道入口更爽脆鮮甜到一個點呢!而且只須$30/隻便可享受得到實在太化划算了吧!
是日車爸爸要如常工作而且收得比較夜所以只能求其煮一碟白酒大蜆手捲粉便算了,這款手捲分在某餐廳吃過之後就愛上了它!口感超al dente每配襯鮮甜大蜆和白酒很富吸引呢!
如果大家心水清都應該會記得車爸爸生日亦即是羅車車的生忌,以往我會自己制作他父子倆每人一個蛋糕!可惜今年已提不起勁去做蛋糕了!所以就買現成的雪糕蛋糕送給爸爸慶祝生日希望佢唔好介意啦!
其實車爸爸不是愛吃蛋糕之人!所以我便買咗這個芒果味的雪糕蛋糕希望他喜歡吧!在此祝他生日快樂!身體健康、出入平安、永遠幸福。
接下來這餐是預備中秋的應節晚飯,因為不知這爸爸原來中秋節放假所以我哋就在上個星期提早做節,這天主題是新鮮海鮮大餐呀!
當然我唔會放過再食生蠔的大好機會!這天亦都是荷蘭佳麗這一隻品種跟上一趟吃的有點不同,但同樣入口爽脆味道鮮甜而且今次仲要再便宜多一點只需$28就可以買到一隻喇!
看這個巨大肥美的生蠔令立立的外表已經令人垂涎欲滴吧!大家看車爸爸吃得多兇狠多快樂便知質素有多高!

另外還炒了一碟他喜歡吃的豉椒炒蜆,我就比較喜歡用沙蜆因為比較鮮味,但真係要搵一個相熟的檔口買,如果買到浸得唔夠乾淨多沙的話就全部都要報銷了!
另外再買多四隻肥大肉厚的大扇貝來炒西芹,感覺上健康多了罪疚感即時調低!西芹爽口又夠香都拜美國貨所賜,國內的西芹食味差好遠㗎!
最後買多條新鮮的紅中魚清蒸,味道好鮮甜肉質亦都夠嫩滑,記得有一次試過吃白板魚呢!下次試埋發財咁就十三么都食出啦哈哈!
中秋節就最多甜美生果吃這夜我哋都唔客氣食完飯再食豐富生果及月餅,有韓國的水晶梨、富有柿、仲有我好喜歡吃的人參果全部給我們KO晒,我家車爸爸真係好喜歡食生果呢!!

而昨晚其實冇乜特別慶祝活動!只不過車爸爸昨晚返完工就連放三日假,就當佢放假前的慶祝晚飯啦!
我經常都話男士們要食多些蕃茄對前列腺係好有益的,不過番茄又唔係人人鍾意食!太太們真係要諗下辦法!而車爸爸就比較喜歡吃蕃茄炒蛋因為好下飯嘛!
而車媽媽就極力推介大家試這款本地農場粵皇雞所生的雞蛋,絕沒有打激素針催谷而大的雞蛋身型會比較細小巧,但係蛋味就超級香濃不過價錢亦相對較高要$50/12隻!
這夜碰巧開了一隻孖生雞蛋,我好像是第一次開到孖蛋黃的真係好神奇!
這趟煮的蕃茄炒蛋我並交沒炒勻!皆因蕃茄數量比較多如果兜亂煮蛋會因為太濕潤而變得黐立立唔好食,所以我就將蕃茄圍邊待吃飯時才混在一起,這樣吃口感會教為出色!
車爸爸亦再次要求我蒸雞給他吃佢真係特別喜歡我煮的雞啊!那好吧就買一隻超美味的肥雞煮過佢食啦!今次簡單的只將雞抹上鹽巴然後清蒸,已經好吃非常因為最重要隻雞有雞味呀(麗梅姐上身)!
最後飲埋在車婆婆家取回來的青紅蘿蔔湯真係飽到上心口呀!btw大家覺唔覺得隔夜湯特別甜特別好飲㗎!

4 則留言:

  1. 一睇蕃茄炒蛋嘅蛋好似心形一樣,就知羅家飯實情是甜甜蜜海鮮盛宴就真!

    回覆刪除
  2. 回覆
    1. 遲些約大家來食餐冇(食送)飯!

      刪除